KACA

dadi manungsa

kang isa niru  watake kaca

kang isa tiniru marang wong liya

kaca  ora gelem  ngomong eleke manungsa

kaca  ora isa  ngumbar apes bejane sira

kaca  ora bakal  ngujar barang ala

ananging ..

kaca  tansah nyimpen

rasa atine  wong liya

kaca  tansah ngomong  apa kang ana

umpama kaca  ana ing sajroning jiwane sira

ora  kelakon ana

jumantara  dadi buwana,

buwana  dadi jumantara

BALADHA PRAWAN ETANAN

Purwane alus.

Sakabehe laku linakoni kanti ati kang lurus

Sadengah titah ngugemi darmane kang tumuju atine kang tulus..

Ora mokal para priya kedarung-darung.

Ora amung katut ayune raga

Nanging uga sucine jiwa.

Kalah ing trengginas,,

Nanging pinunjul ing pamawas.

Madyane owah

Rikala pitepungan karo donya sabubare lawang jinangkah.

Tepang marang kahanan saliyane omah lan sawah..

Walah ..walah.. malah kekarepane ucul pendak wengi..

Kanggo njajali barang kang tinuku kanthi rega sing wah..

Ora gelem nyekel anak ubet muter.

Kojahe saiki wis sarwa simple, undang wae baby sitter.

Adhuh biyung…

Kaya ngono polahe kang kesandung wuyung.

Gasik anggone tepung bab kang durung karuan tlisik

Wusana bubrah.

Ora gelem adang sega apa maneh isah-isah.

Saiki jaman modern,hape gari dudul ora perlu nglakoni proses kang susah.

Wani ngumbar pupu lan dada kang semi dibelah

Walah…walah…pathing blenuk

Karepe gur oleh disawang nanging ora oleh digoyang

*Lho…?

Padahal anggone jejogedan wis ngasi tutug

Apa maneh wis ngadhepi aplikasi sing aran Tik Tuk.

Sapa ta janjane ?

Kae lho, prawan negara tangga, sing genah dudu prawane wong Jawa.

JUPITER ISIH MUTER

Jupiter wengi iki isih muter Kangmas..

Agung cumlorote ajeg merbawani langit bang wetan.

Wengi iki Jupiter isih muter Kangmas.

Timik-timik njungkelake lakune mangulon.

Mbok bisaa sepisan nadyan ta sasuwene urip.

Kelakon ing papan kana,

Jembar panyawang isa namatke lakune.

Jupiter wengi iki isih muter Kangmas..

Dak slimur tanganku wengi iki nulisake layang tumuju kang kinapang

Wengi iki Jupiter isih muter, Kangmas..

Lumantare angin, mbok iyaa krasa apa kang dadi wisikku wengi iki.

Babagan abote lakon sing janjane dak jarak dewe.

Perkara kang ora nyawang kadang gandhengan..

Mesisan ngantem luruse dalan pangestu anggone nyekel pagawean.

Jupiter wengi iki isih muter Kangmas..

Sapa kang bisa dadi tudingan.

Rikala karepe awak kudu den penggak wong sing wis ora ana hak..

Den sepatani minangka boca buwangan.

Ora isa dipapanke ora isa dipernahake laku uripe.

Jupiter wengi iki isih muter Kangmas..

Enggal-enggala oleh pepadhang kanggo lantarane jalaran.

RASA

Sumuruping sang bagaskara ana ing bang kulon

Angiringi tedhak langkahmu ing paran sore kuwi

Wong bagus kang araga layu

Datan sulap marang mas picis raja brana...

Kandha ing aneng..

Aneng kang ngudhar rasa

Rasa sih kang sumimpen

Awit purwaning nyawang netramu

Wong bagus..

Kang dadi gegayutaning ati

Dadi sumber hawaning dhiri..

Meksa datan krasa yen saben dina dirasa

Aku ora sudi kadya Sarpakenaka

Kang murang tata ngoyak Gunawan Wibisana

Nanging aku uga ora ngluputna Banowati

Nyai Ratu kang kedanan baguse Permadi

Gus..

Datan ana kang luput rikala rasa kang micara

Nanging muga tansah ugemana

Lamun Raden Danapati tansah lila legawa

Rikala Dewi Sukesi datan purun ginarwa

Ora ana kang meksa

Uga datan ana kang pineksa

Wus jamak lumrahe menawa manungsa kedunungan rasa

Nadyan kang dirasa datan tau rumangsa.

BANJARAN BUDHAYA

Lair saka garbaning pertiwi

Jumedhul saka tlatahing jawi

Mijil anggawa piwulangan suci

Anggula wentah jatining diri

Budhaya Jawa…

Kang ambabar arum, ana ing marcapada

Luhur lumantaring cahya

Tansah hamikul wibawa

Budhaya Jawa...

Lenggahing unggah-ungguh basa

Kebak ing tata krama

Tresna tumrap kawruh kabecikan

Mbiyen…

Budhaya Jawa tumuwuh saka pulung ati

Padha hangakeh nguri-uri basa lan sastra

Lembah manah, andhap asor

Iku patrap kang wus lumrah

Hananging... Saiki…

Kasmaran iku nora katon endah peni kadya kala mbiyen

Girisaning budhaya manca, kang durung tamtu laras kalihan pribadi bangsa

Teka datan kendat, kang gawe lena para mudha

Tansah gawe sumelanging jiwa

Tansah gawe suntruking bangsa

Endi…?

Basa kang alus, manis, kang dadi cirine wong Jawa

Endi…?

Karya kang adi luhung,

kang ngemot wulang wuruke budhaya Jawa

Ana ngendi?!

Luhure budi pakarti kang nate mumbul ana ing bebrayan agung?!

Ana ngendi?!

Sulistyane reronce jagad unggah ungguhing basa?!

Ana ngendi?!

Budhaya kang nate ngrembaka ing nusantara?!

Ana ngendi?!

Endahe sekar gending kang dadi panentreme ati?!

Ana ngendi?!

Dolanan tradisional kang tansah agawe guyup rukune diri?!

Ana ngendi?!

Jangkeping trapsila anak marang wong tua?!

Ana ngendi?!

para taruna luhur kang dadi cagaking bangsa?!

Ana ngendi?!

Para satria pinandhita kang tansah nyengkuyung uripe budhaya jawa?!

Ana ngendi?!!!

Apa pancen kabeh wus muspra?!

Apa pancen wus sirna?!

Apa pancen jawa wus kacaplok dening manca?!

Apa pancen kabeh wus ora ana tilas tapake?!

Apa pancen budhaya wus nora apa jati dirine?

Mokal,,

Mokal, lamun...

Jawa bisa kasampir dening manca

Mokal yen ta…

Manca gawe pepatining budhaya

Lamun sira,

bisa dadi prawiratama

Minangka pepagering budhaya

Dadi punggawaning bangsa

Madeg kasatrianing Jawa